2 Thessalonians 1
1ខ្ញុំប៉ូលស៊ីលវ៉ាននិងធីម៉ូថេជូនចំពោះក្រុមជំនុំនៅក្រុងថែស្សាឡូនីចដែលនៅក្នុងព្រះជាម្ចាស់ជាព្រះវរបិតារបស់យើងនិងព្រះអម្ចាស់យេស៊ូគ្រិស្ដ។ 2សូមព្រះជាម្ចាស់ជាព្រះវរបិតារបស់យើងនិងព្រះអម្ចាស់យេស៊ូគ្រិស្ដប្រទានព្រះគុណនិងសេចក្ដីសុខសាន្តដល់អ្នករាល់គ្នា។ 3បងប្អូនអើយ! យើងត្រូវអរព្រះគុណព្រះជាម្ចាស់ជានិច្ចអំពីអ្នករាល់គ្នាដ្បិតជាការស័ក្តសមណាស់ពីព្រោះជំនឿរបស់អ្នករាល់គ្នាចម្រើនឡើងយ៉ាងខ្លាំងហើយសេចក្ដីស្រលាញ់ដែលអ្នករាល់គ្នាមានចំពោះគ្នាទៅវិញទៅមកក៏ចម្រើនឡើងដែរ។ 4ដូច្នេះហើយបានជាយើងអួតអំពីអ្នករាល់គ្នានៅតាមក្រុមជំនុំទាំងឡាយរបស់ព្រះជាម្ចាស់ដោយព្រោះជំនឿនិងការស៊ូទ្រាំដែលអ្នករាល់គ្នាមាននៅក្នុងការបៀតបៀននិងសេចក្ដីវេទនាគ្រប់បែបយ៉ាង។ 5នោះជាភស្ដុតាងអំពីការជំនុំជម្រះដ៏សុចរិតរបស់ព្រះជាម្ចាស់ដើម្បីឲ្យអ្នករាល់គ្នាបានរាប់ជាស័ក្តិសមនឹងនគររបស់ព្រះជាម្ចាស់ដ្បិតអ្នករាល់គ្នារងទុក្ខដោយព្រោះនគរនោះឯង។ 6ដ្បិតនេះជាសេចក្ដីសុចរិតនៅចំពោះព្រះជាម្ចាស់គឺព្រះអង្គនឹងសងសេចក្ដីវេទនាដល់ពួកអ្នកដែលធ្វើទុក្ខអ្នករាល់គ្នាវិញ 7ហើយឲ្យអ្នករាល់គ្នាដែលត្រូវគេធ្វើទុក្ខបានសម្រាកជាមួយយើងនៅពេលដែលព្រះអម្ចាស់យេស៊ូលេចមកពីស្ថានសួគ៌ជាមួយពួកទេវតាដ៏មានអំណាចរបស់ព្រះអង្គ 8នៅក្នុងអណ្ដាតភ្លើងដើម្បីសងសឹកអស់អ្នកមិនស្គាល់ព្រះជាម្ចាស់និងអស់អ្នកមិនស្ដាប់តាមដំណឹងល្អរបស់ព្រះយេស៊ូជាព្រះអម្ចាស់របស់យើង។ 9ពួកគេនឹងទទួលទោសជាសេចក្ដីវិនាសដ៏អស់កល្បជានិច្ចគឺឃ្លាតឆ្ងាយពីព្រះភក្ដ្រព្រះអម្ចាស់និងពីអំណាចដ៏មានសិរីរុងរឿងរបស់ព្រះអង្គ 10នៅពេលដែលព្រះអង្គយាងមកដើម្បីទទួលការលើកតម្កើងនៅក្នុងចំណោមពួកបរិសុទ្ធនិងដើម្បីទទួលការស្ងើចសរសើរនៅក្នុងចំណោមពួកអ្នកជឿទាំងអស់នៅថ្ងៃនោះព្រោះអ្នករាល់គ្នាបានជឿសេចក្ដីបន្ទាល់របស់យើងហើយ។ 11ហេតុនេះហើយបានជាយើងអធិស្ឋានឲ្យអ្នករាល់គ្នាជានិច្ចសូមឲ្យព្រះជាម្ចាស់របស់យើងរាប់អ្នករាល់គ្នាជាស័ក្តិសមនឹងការត្រាស់ហៅរបស់ព្រះអង្គហើយឲ្យព្រះអង្គសម្រេចគ្រប់ទាំងបំណងល្អនិងកិច្ចការដែលធ្វើដោយជំនឿដោយអំណាចរបស់ព្រះអង្គ 12ដើម្បីឲ្យព្រះនាមរបស់ព្រះយេស៊ូជាព្រះអម្ចាស់របស់យើងទទួលការលើកតម្កើងនៅក្នុងចំណោមអ្នករាល់គ្នាហើយអ្នករាល់គ្នាក៏ទទួលការលើកតម្កើងនៅក្នុងព្រះអង្គដែរតាមរយៈព្រះគុណរបស់ព្រះជាម្ចាស់របស់យើងនិងព្រះអម្ចាស់យេស៊ូគ្រិស្ដ។
Copyright information for
KhmKCB